Bènvenuti néa pajina de "El Maéstron"

Come ze nel me stile de scritore, umorista e cabarétista, sénpre in léngua vèneta, qua, almanco par adèsso, métarò e publicarò solo monade o foto èbeti, o quasi, parché, anca se no pare, na imagine umoristica pol sussitare sì, la risata, ma anca on pénsièro sèrio su cossa rapresénta sta imagine. Tuto ciò premésso, pérò, no vol dire assolutaménte che mi sia èbete totale, o on macacon, o almanco lo spèro. Me piase usare la satira, l'ironia, el sberléfo, par métare in evidénsa i lati bruti de la vita quotidiana e ridarghe su, come ad esénpio le cagade dei nostri govérnanti che ne sassina cresséndone le tasse e la bénzina, e lori se auménta el stipéndio, le carognade dei capo uficio che spaca i maroni a manéta par gnénte, o par farse séntire dal paron che lù se fa rispétare, le stronsade de tuti quéi che se créde inteigénti e invésse i ze mona totali, a 360 gradi.

Bòn divertiménto alora, e ricordève sénpre che el riso fa bòn sangue, e da na bona sganassà, come da na bona répossà, no ze mai morto nissun. Riguardève sénpre comunque, in quasiasi posto ve dovéssi  trovare, da on musòn, che varda basso, che no ride mai, gnanca quando el copa el porsèo; prima o dopo el ve lo métarà de bruto nel Bussolòto del cacào.  

Comunque, par prémunirme contro evéntuai dénunce  da parte de ronpicojoni vari, o basabanchi, dai zénoci incalìti, che va a far la comunion tute le matine e dopo se i pol mai i incula el prossimo a tuta manéta

                                 dichiaro soleneménte che...

Eh na volta, no ghe jèra conputers, e gnanca television, alora se andava in lèto prèsto, par sparagnare la luce. Riscaldaménto poco o zero assoluto; marìo e mojère se stava tacà e, inévitabilménte, oni nove mési nasséva on bocia...  I tosatèi zogava co le figurine, co le baléte, a lipa, a momola, poco magnare, ma sémo vegnù grandi anca, co tanti sacrifici. Ancò ghe ze caldo in casa, zoghi elétronici, da magnare, television...nasse pochi fioji, i grandi zoga col conputer....Mi digo che se se vol stare na s-cianta ben ze mèjo no, tornare indrio, ma fare come sto siorato qua: manco internet, e più cabernet... e ch'el sia de quéo bon. 

Sito in léngua vèneta 

Mi trovate anche su

blog personale